इंटरनेट - सहज... सोपं..

शोधताना ! - १

2009-11-23T04:48:00.000-08:00

इंटरनेटवर शोध घेताना आपण सर्च इंजिनचा वापर करतो आणि आता ते आपल्या अंगवळणी ही पडल आहे. पण तरीही त्याचा आपण पूर्णपणे वापर करतो का? आपण फक्त आपल्याला हवा आहे तो शब्द टाकतो आणि पुढे जातो.

माणसाच्या गरजेनुसार व आवडीनिवडी नुसार आता सर्च इंजिन आता उपलब्ध आहेत. yahoo, google, msn, ask अशी अनेक आपण आपल्या गरजेनुसार ते निवडून वापरायचे असते. प्रत्येकाची स्वत:ची वैशिष्ट्ये आहेत. त्यानुसार ती वापरली तर आपल्याला अधिक चांगले व लवकर शोध परिणाम मिळतात. याहू व गूगल ही आजची आघाडीची सर्च इन्जिन्स आहेत आणि ती आपण वापरतोही. पण त्यातून हवे ते परिणाम कसे शोधायचे किंवा त्याचा विविध प्रकारे वापर कसा करायचा ते पाहू.

याहू!
तुम्ही याहूच्या answers,jobs किंवा directory सेवेचा वापर करून गोष्टी शोधू शकता एवढेच नव्हे तर ते तुम्ही साठवून ही ठेवू शकता. तुमचे जर याहू वर खाते असेल तर तुम्हाला अजून अनेक सेवा वापरता येतील. आपल्या देशातील याहू सर्वर वर आपल्या देशाशी संबंधित माहिती याहू सतत त्याच्या अनुक्रमणिकेत जोडत असते. त्यानुसार जुळणारे निर्णय ते आपल्याला शोध करताना देते.
याहूने त्यांच्या local सेवेचा ही यात समा्वेश केला आहे.ज्यात तुम्ही अनेक व्यावसायिक तसेच वैयक्तिक माणसांच्या माहितीचे शोध घेऊ शकता. इतकेच नव्हे तर तुमच्या शहराचे नाव टाकल्यास ते त्यानुसार ही तुम्हाला शोध परिणाम देईल. त्यांच्या वर्गवार रचनेतून जर गेले तर कित्येक प्रकारच्या गोष्टींचा तुम्ही शोध घेऊ शकता हे तुमच्या लक्षात येईल.
याहूमधे शोध घेताना तुम्ही फक्त याहूच नव्हे तर दैनिक भास्कर, दैनिक जागरण किंवा बी बी सी अशा वार्तापत्रांच्या संस्थळातून ही शोध घेऊ शकता. सर्वात जवळ्चे शोध परिणाम याहूने आता पर्यंत दिलेले आहेत.
याहू सर्च सजेशन ही सेवा सर्वात प्रथम इंटरनेटवर आली आणि त्यानंतर इतर सर्व सर्च इंजिन नी ती उचलून धरली.सर्च सजेशन मधे तुम्हाला तुम्ही टंकित केलेल्या शब्दांच्या आधारे अंदाजे काही शब्द सुचवले जातात जे तुम्हाला अजून अचूक निर्णय घ्यायला उपयोगी पडतात.
तुम्हाला जर काही प्रश्न असतील तर तो प्रश्नच त्या सर्च रकान्यात लिहा आणि विचारा .. तुम्हाला याहू आन्सरस सेवा उत्तर देइल इतकेच नव्हे तर इतर चार लोकांची मते ही त्यावर कळतील. जर तो प्रश्न जर अस्तित्वातच नसेल तर याहू स्वत: उत्तर देइल. आहे ना interesting !!
तुम्हाला अनेक प्रश्न असेल की अजून काय काय करता येत याहूवर .. तर ते तुम्ही स्वत: च पाहू शकता .. इथे !

गूगल:
गूगलने आजपर्यंत दिलेल्या सेवांपैकी सगळ्यात जुनी सेवा आहे ही आणि सगळ्यात जास्त वापरले जाणारे हे सर्च इंजिन आहे. विविध प्रकारांमधे इथे सहज शोध घेता येणं ही याचि खासियत आहे. गूगलवर तुम्ही चित्र, व्हिडीओ, नकाशा, बातम्या, ओर्कुट च नाही तर तुमच्या जीमेल खात्यातील शोध ही घेऊ शकता. तसेच इतर अनुदिनी [blogs] पुस्तके यातही तुम्ही शोध घेऊ शकता. तसेच सेवा म्हणून तुमच्या साठी गूगलने काही स्मार्ट शब्द तयार केले आहेत.
उदा.

जर तुम्ही weather Pune, India असा शोध दिलात तर तुम्हाला प्रथम वातावरणाचा अंदाज दिला जातो आणि मग त्यासंबंधी दुवे दाखवले जातात.
किंवा जर तुम्ही time Mumbai लिहिल आणि शोध घेतलात. तर तुम्हाला वेळही दाखविली जाते.
तुम्हाला माहित आहे का .. गूगलच्या सर्च इंजिन मधे एक कॅल्क्युलेटर आहे. तुम्ही जर (2+2)*100 असे लिहून शोधलेत तर तुम्हाला फक्त उत्तर दिले जाईल. आहे ना मजेदार !
गूगल मधे स्वत:चा मापक परिवर्तक [unit convertor ]आहे. 15 cm in kilometers असा सर्च दिल्यावर त्याने 15 centimeters = 0.00015 kilometers अस उत्तर दिल नाही तर सांगा ..

अजून बर्‍याच गोष्टी आहेत गूगल बद्दल जरा शोध घ्या सापडतील!
उदा : हे पान पहा .. गूगलची सर्च वैशिष्ट्ये !

शोध घेताना फक्त वरच्या दोनच सेवांचा अधिकतम वापर करताना सर्व लोक दिसतात. पण त्यापेक्षाही विविध सेवांचा वापर करून तुम्ही चांगले शोध घेऊ शकता. अशा कुठल्या सेवा आहेत ? ते पाहू पुढील भागात !!

वन्दे मातरम !

2009-08-15T22:39:00.000-07:00

खूप दिवसानी लिहाव अस वाटत होतं पण होत नव्हत .. आज भारताचा ६३वा स्वातंत्र्यदिवस .. भारतमातेच्या चरणी स्वत:चे बलिदान देणार्‍या शूराना आठवण्याचा दिवस .. त्यांची अपुरी कार्ये पूर्ण करण्याचा संकल्प करण्याचा दिवस. स्वातंत्र्य दिनाच्या दिवशी कार्यक्रम आटोपून आल्यावर मला प्रकर्षाने उणीव जाणवली ती वंदेमातरम च्या पूर्णत्वाची .. का आपण अजून ही अर्धवट म्हणायचे ?.. विचार करता करता मी सहजच youtube या संस्थळावर शोध घेतला ..त्या पैकी हे काही पहावेत/एकावेत आगळेवेगळे असे व्हिडीओ...

वन्दे मातरम्
सुजलां सुफलां मलयजशीतलाम्
शस्यशामलां मातरम् ।
शुभ्रज्योत्स्नापुलकितयामिनीं
फुल्लकुसुमितद्रुमदलशोभिनीं
सुहासिनीं सुमधुर भाषिणीं
सुखदां वरदां मातरम् ।। १ ।। वन्दे मातरम् ।

कोटि-कोटि-कण्ठ-कल-कल-निनाद-कराले
कोटि-कोटि-भुजैर्धृत-खरकरवाले,
अबला केन मा एत बले ।
बहुबलधारिणीं नमामि तारिणीं
रिपुदलवारिणीं मातरम् ।। २ ।। वन्दे मातरम् ।

तुमि विद्या, तुमि धर्म
तुमि हृदि, तुमि मर्म
त्वं हि प्राणा: शरीरे
बाहुते तुमि मा शक्ति,
हृदये तुमि मा भक्ति,
तोमारई प्रतिमा गडि
मन्दिरे-मन्दिरे मातरम् ।। ३ ।। वन्दे मातरम् ।

त्वं हि दुर्गा दशप्रहरणधारिणी
कमला कमलदलविहारिणी
वाणी विद्यादायिनी, नमामि त्वाम्
नमामि कमलां अमलां अतुलां
सुजलां सुफलां मातरम् ।। ४ ।। वन्दे मातरम् ।

श्यामलां सरलां सुस्मितां भूषितां
धरणीं भरणीं मातरम् ।। ५ ।। वन्दे मातरम् ।।

या व्हिडिओ बद्दल सांगण्याची गरजच नाही !

Vishnupant Pagnis - Another rendition of Vande Mataram in Vrindavani Sarang raga by hapless Mr. Pagnis circa 1920. He changed the order of stanzas.

by hari bharadwaj

India's national song 'Vande mataram' rendered by Shashank, renowned flautist

एक दूरदर्शनवरील जुना व्हिडीओ...

कित्ति गोड ...

and lastly .. very eye opening approach !

think about it ..
वंदे मातरम !

देवनागरी लेखनाची सुलभ तंत्रे !

2009-05-25T06:41:00.000-07:00

मराठी असे आमुची मायबोली
जरी आज ती राजभाषा नसे

सर्वत्र आंग्लाळलेल्या या ई-विश्वात एक ना एक दिवस नक्की मराठी भाषेला चांगले दिवस येतील, अनेक लोक मराठी भाषेमधेच त्यांची संस्थळे निर्माण करतील, एकमेकांशी मराठी मधे विपत्र व्यवहार करतील, सर्वांना समजणा-या अशा भाषेतून जगातील नव नवे तंत्रज्ञान एक दिवस लोकांसमोर येइल.. अशी स्वप्ने उराशी धरून काही माणसं या नवीन ई-विश्वात मराठी भाषेचा विचार करून त्यावर प्रयोग करू लागली आणि त्यातून त्यांने अनेक नवनवीन तंत्रे यातून विकसित झाली. गमभन, लिपीकार, बरहा अशा मला माहित असलेल्या तंत्रांचा व त्या वरील माहितींच्या पोस्टसचा हा एक संग्रह.. तुमच्यासाठी

देवनागरी लेखन करण्यासाठी
मायबोली.कॉम हे मराठीतील पहिले संस्थळ..
त्याचा उल्लेख करून आता पुढील यादीला सुरुवात करतो ! :)

गमभन लेखन पद्धती

ह्या प्रणालीमधे आपण प्रमुख भारतीय भाषांमधे टंकलेखन करू शकतो. अनेक संस्थळे जसे मनोगत.कॉम, मिसळपाव.कॉम, मराठीब्लॉगविश्व ही या प्रणालीच्या तंत्रावरच काम करत आहेत. त्यात मराठी, हिंदी, संस्कृत, गुजराथी, गुरूमुखी, बंगाली, कन्नड, मल्याळम, तेलुगू या प्रमूख भाषांचा समावेश आहे.गमभन लेखन पद्धती वापरण्यासाठी वरील नावावर टिचकी मारा. या प्रणालीचे ही वेब प्रत आहे. त्याच बरोबर गमभन ने वेबकारांना [web designers developers] त्याची प्रगत प्रत ही Download साठी उपलब्ध केली आहे. अधिक माहितीसाठी इथे टिचकी मारा.

बरहा तंत्र

ही एक लोकार्पित मोफत संगणक प्रणाली आहे जी प्रामुख्याने द्क्षिणेतील भाषांच्या लेखनासाठी तयार केली. त्यामधे प्रामुख्याने मराठी, हिंदी, संस्कृत, गुजराथी, गुरूमुखी, बंगाली, कन्नड, मल्याळम, तेलुगू या भारतीय भाषा आहेत. या प्रणालीचा वापर फकत वेब साठीच नाही तर इतरही दैनंदिन टंकनासाठी ही करता येतो. या प्रणालीमधे आपणास बरेच पर्याय उपलब्ध आहेत. यात अनुवाद करण्याची ही सोय आहे. अधिक माहितीसाठी इथे टिचकी मारा.

लिपीकार

ही पध्दतही सोपी आणि सुटसुटीत आहे. ह्यात अनेक सोयी आहेत. विंडोज मधील कार्यालयीन प्रणालीतही ही प्रणाली वापरता येते. ह्यात आपण SMS मधे टंकन करतो तसे टंकन करायचे आहे. याची एक वेब प्रत आहे.ती आधी तुम्ही वापरून पहा. यात हिन्दी, बांग्ला, मराठी, तेलुगू, संस्कृतम्,‌ मल्याळम, नेपाली, गुजराती, गुरूमुखी,कन्नड, तमिळ,असमिया, उर्दू अशा भाषांचा समावेश आहे.अधिक माहितीसाठी इथे टिचकी मारा.

क्वीलीपॅड

ही सुद्धा एक सहज तंत्रप्रणाली आहे. यात वरील सर्व प्रणालींसारख्याच सुविधा आहेत पण यांचे वैशिष्ट्य असे की या संस्थेने भ्रमणध्वनी संदेशासाठी[मोबाईल मेसेजसाठी] वेगळी यंत्रणाही दिलेली आहे. जी अजून तितकी लोकप्रिय नाही.तुम्ही जरूर एकदा या यंत्रणेचा लाभ घ्या.अधिक माहितीसाठी इथे टिचकी मारा.

अजून काही टंकलेखन प्रणाली आहेत. त्या खाली दिलेल्या आहेत.
मराठी जगत
MAFSU
हिंदीनी
युनिनागरी
त्याच बरोबर gmail,blogger,orkut या गूगलच्या तसेच yahoo messanger, yahoo mail अशा सेवांमधेही आता देवनागरी सेवा सुरू केल्या आहेत.

अजून माहिती हवीये ?

वरील प्रणालींमधे काही फरक आहेत पण टंकन करायची पद्धत एकच आहे. त्या त्या संस्थळांवर त्यांची मदत उपलब्ध आहेत. पण तरीही काही लेखकांनी व ब्लॉगकारांनी काही लेख लिहीले आहेत ते खाली देत आहे.
देवनागरी संगणक प्रणाली
युनिकोड मध्ये टंक डाउनलोड न करता ऑनलाईन लिहिणे
मायक्रोसॉफ्ट भाषा प्रकल्प
मराठी-हिंदीत टंकन करण्याची पद्धत
महती आणि माहिती
'संगणक आज्ञावली' मराठीतून शक्य आहे का?

काही अजून पहावी अशी संस्थळे
अवकाशवेध
मराठी माती
मनोगत
काही उपयुक्त संकेतस्थळे
आठवणीतील गाणी
पु.ल. देशपांडे

तुम्हाला काही विसरल्यासारखे वाटत आहे का ?
तुम्ही कोणती पद्धत वापरताय?
तुमच्या आवडीची कोणती पद्धत आहे?
जरूर लिहा.

flock - एक सोशल ब्राऊझर ..

2009-05-16T10:52:00.001-07:00

बगळ्यांची माळ झुले अजूनि अंबरात
भेट आपुली स्मरशी काय तू मनात?

Flock - म्हणजे पक्ष्यांचा थवा ..
पक्षी जसे त्यांच्या थव्यांना सोडून कुठे जात नाहीत एकत्र एकमेकांच्या संपर्कात असतात. तसेच माणसाला आपल्या ऑफिसमधल्या क्युबिकलमधे असून ही सहजपणे मित्रांच्या - घरच्यांच्या संपर्कात राहता यावे या उद्देशाने हा ब्राऊझर तयार केला गेला आहे. इंटरनेटवर ओर्कुट सोडून ही ब-याच कम्युनिटीज आहेत ज्या खूप प्रसिद्ध आहेत आणि त्या सर्वांत लोक हिरीरीने सहभाग घेत असतात. लोकांचा हा वाढता ओढा पाहून हा फ़्लोक अस्तित्वात आला आहे . काही दिवसांपूर्वी आपण इंटरनेट एक्स्प्लोरर ची माहिती घेतली होती. आता बरेच लोक मोज़िला फायरफॉक्स ही वापरत आहेत. याच तंत्रज्ञानावर आधारित असलेला हा एक ब्राऊझर आहे. जो तुम्हाला इथून डाऊनलोड करता येतो. हा ही मोझिला गटातील असल्याने फुकट आहे. याच्यात फायरफॉक्स प्रमाणे टॅब्ज आहेत. add ons आहेत. हा अत्यंत वेगवान ही आहे. मग तरी ही वेगळं अस काय आहे यात ?
अशी अनेक वैशिष्ट्ये या ब्राऊझर मध्ये आहेत जी तुम्हाला फायरफॉक्स मधे काही कारणाने मिळत नाहीत.

ब्लॉग संपादक : [blog editor]

या मध्ये तुम्ही तुमचे blogger, wordpress आणि तत्सम ब्लॉग्स नियंत्रित करू शकता. नव्या पोस्टलिहून प्रकाशित करू शकता आणि त्या संपादित ही करू शकता. याचा वैशिष्ट्यपूर्ण सुसज्ज interface तुम्हाला सर्व प्रकारे सहाय्यक आहे आणि तुम्ही तुमच्या ब्लॉग्स वर न जाता ह्या सर्व गोष्टी नियंत्रित करूशकता.
वेब क्लिप बोर्ड : web clipboard
या मधे तुम्ही संस्थळे [websites] पहाता पहाता .. काही गोष्टींची प्रत बनवून ठेवू शकता व त्या नंतर वापरूही शकता. हा एखाद्या चिमटा असलेल्या पॅड सारखा काम करतो.
माध्यम पट्टी : media bar

या मध्ये तुम्ही flickr, picasa, photobucket, facebook अशा चित्रसंकलक -संयोजक व सामाजिकसेवांवरील मित्रांचे फोटो सहज पाहू शकता. तसेच youtube, truveo वरील ध्वनिचित्रफिती पाहू शकता. तुमच्या संग्रहात त्यांचे दुवे साठवू शकता. त्याचबरोबर या सेवांवर नव्या माध्यमांसाठी म्हणजे छायाचित्रे, ध्वनिचलचित्रे तुम्ही शोधू शकता.
इतकेच नव्हे तर फ्लोक तुम्हाला तुमचे इमेल मधील [ Gmail, yahoo, aol mail ]खातेही इथे सहज पणेपहाण्यास मदत करते. यात अजूनही खूप सोयी आणि मस्त विजेट आहेत.

जर तुम्ही फेसबुक, ट्वीटर, फ्लिकर, पिकासा, जीमेल, याहू, एओएल आणि अशा अनेक गोष्टी एकाच वेळेस वापरू पाहात असाल आणि ते तुम्हाला जर सहज करायचे असेल .. तर flock is must !

रेडिओ स्टेशन्स ..

2009-05-08T10:16:00.001-07:00

रेडिओ मिर्ची .. एस एफ़ एम .. आणि त्यांची बडबड .. किंवा विविधभारती वरची सुरेल गाणी आणि त्यांची "निवेदनं" या दोन्ही बद्दल मी काहीही लिहीत नाहीए, मग रेडिओचा इथे काय संबंध ? काय सवाल अस विचारण्यापूर्वीच सांगतो, मी सांगतोय ते इंटरनेट रेडिओ बद्दल.. आता हे काय नवं खूळ ? रेडिओ जुना प्रकार आहे असं ज्यांच मत असेल त्यानी तर हे जरूर करून पहावं.

परवा मी माझ्या कॉम्प्युटरवरची तीच तीच गाणी ऐकून वैतागलो होतो. जरा नवीन काही शोधाशोध गूगलवर चालू होती.. हे चाळ ते चाळ करत करत मी पोहोचलो शाऊटकास्ट.कॉम वर पोहोचलो आणि मला एक खजिना मिळाला.. अर्थात तिथे सर्व रेडिओ स्टेशन्स english होती पण त्यात काही हिंदी सुद्धा होती. अजून एक संस्थळ आहे लाईव्ह ३६५ इथे ही तुम्हाला विविध प्रकारची स्टेशन्स ऐकायला मिळतील. तुम्हाला अजून ऐकायची असतील तर गूगल वर इंटरनेट रेडिओ म्हणून सर्च द्या ..

इंटरनेटवर रेडिओ ऐकण्यासाठी तुम्हाला itunes किंवा Songbird किंवा winamp ही तीन सोफ़्टवेअर्स लागतात. ती तुम्हाला त्या नावांवर टिचकी मारलीत की डाऊन लोड करता येतील. [ तसं वेबसाईटच्या तयार प्लेअरमधे पण ऐकता येत पण या दोन सॉफ्टवेअर्स मधे तुम्हाला अजुन काही नियंत्रण मिळते.]

वरील तीन सॉफ्टवेअर्स वापरण्याची पद्धत
तुम्ही Tune in वर क्लिक केल कि तुम्हाला विचारण्यात येतं कि .plc फाईल कोणत्या सॉफ्टवेअरमधे ओपन करायची?
तेव्हा तुम्हाला फक्त winamp or songbird or mediaplayer or itunes सिलेक्ट करायच आहे.
आणि पुढील काही सेकंदात रेडिओ सुरू होईल !

त्याच बरोबर तुमचे ब्रॉडबॅन्ड कनेक्शन किमान २५६ केबी प्रत्येक क्षणास देण्या क्षमतेचे असावे लागते. बाकी तुम्ही एकदा Try कराच त्या शिवाय मजा नाही कळणार.

RaDioTEENTAAL.com 100% InDiAn MuSiC LiVe FrOm PaRiS
Bollywood Music Radio :: Indian Music :: Request your Hindi songs.
Bollywood Classic Hits - Radio NRI
Hindi Radio - Mera Sangeet

ही काही तिथली हिंदी स्टेशन्स आहेत.
सांगा मला तुमचा अनुभव .. आणि हो मी खूप दिवसाने पोस्ट लिहिली आहे .. त्याबद्दल क्षमस्व !

स्प्रेडशीट कसे तयार् करायचे?

2009-02-18T00:56:00.000-08:00

गूगल् मधे स्प्रेडशीट कसे तयार् करायचे त्या विषयीचा हा व्हिडीओ !

गूगल Doc कसे वापरावे ?

2009-02-17T11:21:00.000-08:00

दोन तास audio quality शी झगडून ही मला ती या पेक्षा जास्त सुधारता आली नाही.
त्या बद्द्ल क्षमस्व ! [sorry for bad audio quality.]

गूगल office !

2009-02-16T08:35:00.000-08:00

सकाळची नऊ साडेनऊची वेळ, एका मैत्रिणीचा फोन आला..
" हाय, अरे तू परवा कॉम्प फॉरमॅट करून गेलास पण ऑफीस टाकलंच नाहीस "
" हो ... गडबडीत विसरलोच ! "
" आता मला साडे दहा पर्यंत एक प्रेसेंटेशन करून द्यायचय .. काही ही कर आणि मला ते इन्स्टॉल करून दे.. "
" ते शक्यच नाहीय .. कारण् मी पुण्यात नाहीये ! "
" .. "
" पण तुझ घरचं नेट चालू आहे ना ? "
"हो"
" मग चिंता मिटली .."

" .. "
" गूगल डॉक कधी वापरलं आहेस का ? "

.... त्यानंतर तिच काम सहज झालं आणि मी ही सुटलो ! ..

गूगल डॉक्युमेट्स हे अत्यंत उपयोगी आणि सर्वात महत्वाचे "फुकट" असे साधन आहे. पूर्वी उमेदवारी करणारे तरूण आपापला resume स्वत:लाच इमेल करून ठेवायचे . काही जण आताही करतात .. किंवा काही महत्वाचे डॉक्यूमेंट्स प्रेझेंटेशन्स .. किंवा हिशेबाची स्प्रेड्शीट्स ही त्यांचा पाठसाठा [backup] म्हणून करून ठेवायची .. तर ते दिवस आता गेलेले आहेत. तुम्ही गूगल्च्या साहाय्याने ऑनलाईन सर्व महत्वाच्या फाईल्स - कागद्पत्रे सुरक्षित ठेवू शकता आणि नवीन तयार ही करू शकता !

अधिक माहिती. :
Document - वही - हा प्रकार लेखन आणि गद्य पद्य लिखाण, साहीत्य अशा प्रकाराशी निगडीत आहे. यात टंकलेखन [typing] हा महत्वाचा भाग असतो. लेखक, शास्त्रज्ञ, कवी, माहीतीगोळा करणारे या प्रकाराचा जास्त वापर करतात. या वहीला अनंत पाने असतात आणि खाडाखोड होतच नाही .. कागद वाचतो तो वेगळाच असे याचे अनेक फायदे आहेत.

Spreadsheet - हिशेबवही, खतावणी. - मुख्यत: हा प्रकार सारण्या [Tables] शी संबंधीत असल्यामुळे या प्रकाराचा वापर हिशोब, नोद्ण्या, किंवा गणिती वापरासाठी होतो. या प्रकाराचा वापर ही भरपूर प्रमाणात होतो. यात काही सूत्रे योग्य जागे बसवली की बाकीची गणिते आपोआप केली जाऊ शकतात. तसेच काम ही भराभर होते.. काहीजण याल excel sheet असेही म्हणतात.

Presentation- slide show - तक्ते, हा प्रकार मुख्यत्वे करून जिथे कमी शब्दात, आकर्षकपद्धतीने माहीती द्यायची गरज असते त्याठिकाणी वापरला जातो. उदा. कॉन्फरेंस मधे, किंवा जाहिरातीसाठी, संदेश देण्यासाठी, लहान मुलांना समजवण्यासाठी ही ह्या प्रकाराचा वापर केला जातो. पूर्वी ज्या प्रकारे एक एक फोटो, चित्र दाखवून एखादी गोष्ट सांगितली जात असे त्याचेच हे आधुनिक स्वरूप आहे.

या करता तुम्हाला फक्त एक gmail चे खाते काढावे लागते. बाकी काही ही लागत नाही. जर तुम्ही आधीच gmail वापरकर्ते असाल तर फक्त खालील दुव्यावर टिचकी मारा आणि तुमचा नाव व परवलीचा शब्द [ username & password ] टाका आणि तुमच्या समोर गूगलच्या या सेवेच मुख्यपान उघडेल ज्यात तुम्ही लिहीलेल्या, नवीन तयार केलेल्या सर्व वह्या, तक्ते, हिशेबसारण्या[Documents, Presentations, Spreadsheets] कालानुक्रमे दिसतील. जशा खालील चित्रात दिसत आहेत. यात new वर गेलात की तुम्हाला नवीन काय काय बनवता येते ते कळेल .. आपण उद्याला एखादी वही [Document] बनवू या .. तो पर्यंत

धीर धरी .. धीर धरी .. !

नवीन वर्ष .. नवी सुरूवात.

2009-02-05T02:08:00.001-08:00

आज खूप दिवसानी लिहीत आहे. नविन वर्षाची सुरूवात काही मनासारखी झाली नाही, काही ना काही वाईट बातम्या येत गेल्या. त्या नंतर काही गडबडीची कामही उरकली .. आता जरा उसंत मिळाली आहे तर मी परत आलोय . .. तुमच नवीन वर्ष मस्त सुरू झाल असेल .. नवे संकल्प नवे विचार .. .. असो.

भेटू लवकरच !

हल्ला .. आणि सुटका..

2008-12-12T07:22:00.001-08:00

खूप दिवसानी आज काही तरी लिहीत आहे .. त्या मागे कारण ही तशीच आहेत.. मुंबईवर अतिरेकी हल्ला झाला त्या नंतर काहीच लिहावंस वाटत नव्हतं ना काही उत्साहान कराव वाटत होत.. थोडासा त्यातून बाहेर पडत होतो तोवर माझ्यावर अतिरेकी हल्ला झाला ..घाबरू नका मी अगदी सुरक्षित आहे. दोन दिवस झुंज देऊन एक एक करून ४५ अतिरेकी मारले आणि मगच ही पोस्ट लिहायला बसलो आहे.

समाजात घुसून किंवा वसती करून रहाणा-या व त्याच समाजास घोर हानि पोहोचवून विकृत आनंद मिळणा-या लोकांना आपण आतंकवादी अथवा अतिरेकी म्हणतो. माझ्याही बाबतीत असंच घडलं पण थोड वेगळं..

माझ्याच संगणकात काही काळ राहून इतरत्र पसरून स्वत:ची मुले बाळॆ वाढवून अचानक एका संगणकीय विषाणू ने माझ्या संगणकावर हल्ला केला. माझ्या हार्डडिस्कची सर्व दारे त्याने बंद केली आणि त्यामुळे मला काहीही वापरणे अशक्य झाले होते.. माझ्या संगणकावर नेहमीचे काही विषाणूरोधक [anti viruses] होते पण त्यानाही शेंडी लावून हे पसरले होते.झालं... माझं मस्तक पिसाळलं .. सुदैवाने मला [internet] मायाजालाचा संपर्क करता येत होता आणि त्यामुळे मला प्रतिकार करण शक्य झालं, AVG Antivirus, NOD 32, AVAST, Stinger, अशा अनेक तुकड्यांची मदत घेत मी ते एक एक करून सर्व टिपले .. quarantine केले आणि सुटकेचा श्वास सोडला.. आता माझ्या हार्ड डिस्कची स्थिती सुरक्षित आहे .. woooh ..

computer virus किंवा संगणकीय विषाणू हा एक प्रोग्रॅमच असतो जो स्वयंचलित असतो आणि त्याला आपल्या शिवाय दुसराच कोणितरी [नतद्रष्ट] " इसम " वापरत असतो. हा अगदी मानवी शरीराला होणा-या संसर्गासारखाच असतो. तो तुमच्या संगणकाला हानी पोचवेलच असे नाही. ते संगणकामधे बदल घडवून आणतात आणि काही काळ शांत रहातात .. त्यानंतर अचानक बदल घडवून आणतात की तुम्हाला काही ही करता येण मुश्किल होतं .. काही विषाणू आपल्या संगणकावर एखाद्या वात्रट कार्ट्यासारखे वागतात तर काही खरोखरचे सैतानाचे दूतच असतात. हे विषाणू आपली साठवलेली माहिती पूर्णपणे नष्ट करतात किंवा कधी कधी पूर्ण हार्ड डिस्कच नष्ट करण्याची क्षमता त्यांच्यात असते.
होय, संगणकीय विषाणू हल्ला हा सुद्धा पुढील युद्धातला एक प्रकार असणार आहे. या द्वारे देशांच्या सर्व्हर्स ना अनियंत्रित करून मोबाईल, मायाजाल [internet], दूरध्वनी आणि अन्य महत्वाच्या सेवा विस्कळित करणे हा त्या मागचा उद्देश असेल. त्या विरोधात ही आता काही देशांची पथके उभारली गेली आहेत. आणि त्यात आपलाही देश मागे नाही.

पण यावर उपाय काय? अगदी १००% नाही पण तात्पुरति सुरक्षा म्हणून ह्या प्रणाली वापरल्या जातात. मी काही वर दिल्या आहेत त्यातल्या काही सशुल्क आहेत तर काही विनामूल्य आहेत. ही मायाजालावरून सदैव माहिती गोळा करून नवनवीन विषाणूंशी मुकाबला करायला तयार तत्पर असतात. त्यामुळे ८०% धोका टळतो. पण त्यातून ही काही विषाणू सुटतातच जे त्याला कधीच सापडत नाहीत.

विषाणू रोधक प्रणाली म्हणजे विषाणूंचा एक कोषच असतो ज्यात ते संगणकावरील सर्व फाईल्स ना चाळताना तुलना करून पहातात आणि जर त्याच्याशी मिळता जुळता एखादा प्रकार सापडला तर तो व्हायरस किंवा विषाणू समजून मारून टाकतात. डीलिट ची पदवी त्याला देतात :D .. i mean त्याला डीलिट करतात.

प्रत्येकाला आपली संगणकीय माहिती, जुने फोटो, गाणी, खेळ, कामाचे दस्त ऐवज आणि इतर संग्रह प्याराच असतो. तो विनाकारण का धोक्यात घाला? तुमच्याही संगणकावर अशी काही यंत्रणा असायला हवी .. जी असे विषाणू शोधून ते मारू शकेल आणि तुमचा साठवलेली, संग्रहित माहिती सुरक्षित राहिल. जर या आधिच तुमच्या संगणकावर ही प्रणाली असेल तर तुम्ही कोणती वापरता ? आणि नसेल तर तुम्हाला ज्याने संगणक दिलाय त्याला त्यासंबंधी नक्की विचारा..

लवकरच प्रसारित होत आहे : सुरक्षेचे Internet Explorer मधील उपाय.

निषेध ! निषेध .. त्रिवार निषेध ..

2008-11-27T11:00:00.001-08:00

काळरात्री कशाचीही पर्वा न करता देशाच्या रक्षणासाठी स्वत्वाचा होम करणा-या सर्व हुतात्म्यांना आदरपूर्वक श्रद्धांजली. या हल्ल्याचा निषेध म्हणून तसेच हुतात्म्यांना श्रद्धांजली म्हणून नेटवि्द्यार्थीवर पुढील आठवडा वरील चित्रकडेच्या मथळ्यात लावणार आहे. त्याच बरोबर काळ्यारंगाची पार्श्वभूमि राहील. माझी वैयक्तिक विनंती आहे की हे चित्र तुम्ही ही तुमच्या ब्लॉगच्या दर्शनी भागात लावून हल्ल्याचा निषेध व श्रद्धांजली व्यक्त करावी. ही नम्र विनंती

ब्लॉग रीडरला जोडताना !

2008-11-24T09:04:00.000-08:00

नमस्कार..
काय कशी वाटली ब्लॉग यंत्रणा.. ब्लॉग तयार केलात की नाही अजून ? नाही ? अरे मग करा ना लवकर! फुकट आहे .. इतकी सोय आहे .. एखादा करून पहायचा.. कळेल कसा प्रतिसाद मिळतोय ते! आणि केला असेल तर खाली तुमच्या अभिप्रायात लिहा की .. किंवा एखादी लिंक टाका नुसती .. असो ..
मला माहित आहे तुमच्या मनात अजून ही शंका आहे की माझ्यासारख्या साध्या माणसाच्या ब्लॉगवर कोण येणार? लोकांना काय स्वप्नं पडणार आहेत का मी ब्लॉग सुरू केल्याची?
अगदी बरोबर आहे ही शंका.. माझ्याही मनात ती आली होती! .. [ ती म्हणजे लगेच शंकेने पाहू नका ! शंकेबद्दलच बोलत आहे मी! :D] असो.. तर त्यावर काही उपाय आहेत तेच सांगणार आहे आज !
दोन उपाय स्वत: गूगलच पुरवत आहे. एक म्हणजे गूगल रीडर आणि दुसरा तुम्हाला माझ्या ब्लॉगच्या शेजारीच followers किंवा चाहते या नावाखाली दिसेल. हे काय आहे ते पहाण्यापूर्वी आपण नक्की ही संकल्पना काय आहे ते पाहू या !
खालील व्हिडीओ हा गूगलने स्वत: प्रकाशित केला आहे. इंग्रजीत आहे. न समजल्यास प्रश्न विचारायला काहीच हरकत नाही..[ पण न समजण्याचा प्रश्न ही येत नाही असा हा व्हिडीओ आहे .. ]

आणि हा ही एक व्हिडीओ पहा
How to setup google reader account ?

हा ही गूगल रीडरसाठी उपयुक्त आहे.
आता हे follower system काय आहे. ते उद्याच्या पोस्ट्मधे पाहू या !

नवे कागद - नव्या पोस्ट ..

2008-11-22T10:55:00.000-08:00

ब्लॉगवर काहितरी फण्डू करत रहाणे माझा छंद आहे.. web designer आहेना! हा नवा बदल कसा वाटत आहे तुम्हाला .. पहा आणि कळवा !

मी आधी ही एक ब्लॉग चालवायचो .. त्यावरही खूप किडे करत मी तासंतास वेळ घालवला आहे. मजा येते.. कोड नव्हे कोडं सोडवल्या सारखं वाटतं.. कारण मी हे असंच डोकेफोड करत शिकत आलोय .. काही तरी नवीन करत रहायला आवडतच सगळ्याना .. आता हेच पहा ना ! जरा बदल म्हणून हे कागद प्रत्येक पोस्टच्या खाली सारलेत.. ते सारायाला इतकावेळ घातलाय की एवढ्यात ख-या कागदांची रद्दी घालून झाली असती ! हौसेला मोल नसतं म्हणतात तेच खरं ..
यात मी एकावर एक टाकलेले कागद दाखवले आहेत आणि त्याना कापायला एक कट मार्क ही टाकला आहे ..
तुम्हाला कसा वाटतोय हा छोटा बदल?

ब्लॉग कसा तयार करायचा ?

2008-11-21T07:51:00.001-08:00

मित्रांनो, कशी झाली ब्लॉगगिरी?
तुमचा ब्लॉग तयार करायचा प्रयत्न केलात का नाही? असो.. नसेल केला तर ही तुमच्यासाठी खास पोस्ट .. ब्लॉग्गर.कॉम वर ब्लॉग कसा तयार करायचा? ह्या मध्ये आपण गूगलचे खाते कसे उघडायचे ते ही पहाणार आहोत आणि ब्लॉग्गरचे ही खाते कसे उघडायचे तेही पहाणार आहोत. पहा आणि तुमचे मत लिहा. परत भेटूच तोवर
happy blogging !

संस्थळांचे प्रकार - २

2008-11-20T08:39:00.001-08:00

संस्थळांचे प्रकार या विषयाला येण्याच एक कारण आहे की आता तुम्हाला Internet explorer मधून संस्थळे पहाता येत असतील, हे नक्कीच पण यात खूप काही करण्याची ताकद आहे हे ही लक्षात आले असेल. आता तुमचा internet म्हणजे विश्वजालातला प्रवास आणखी बहुरंगी करण्याकरताच आता मी काही वैशिष्ट्यपूर्ण संस्थळांची माहिती पण इथे देणार आहे. त्याचबरोबर दुसरं कारण असं की आजच्या ट्रेंड बद्दल तुमच्या मनात जे कुतूहल जागं झालंय आणि ज्यामुळे तुम्ही विश्वजालात त्याची माहिती घेण्याकरता आला आहात त्याच समाधान करणं !

आपण आता पर्यंत संस्थळांच्या शेवटच्या किंवा आडनावावरून त्यांचे प्रकार पाहिले. .com, .co.in, .net वगैरे वगैरे .. आता त्यांच्या उपयोगानुसार प्रकार पाहू. अगदी ढोबळमानाने विश्वजालातल्या संस्थळांचे static , dynamic असे दोन मुख्यप्रकार आहेत आणि त्यातिल dynamic मध्ये आत्ताचे म्हणजे तथाकथित web 2.0 चे प्रकार येतात. forums, Blogs, Portals, Matrimony, Real estate portals, Community websites, Social networking websites, Portfolios, e-commerce, Online services आणि अनेक इतरही !

आज आपण ब्लॉग या प्रकाराची माहिती घेऊ.

हा ब्लॉग फंडा काय आहे ?
Blog = Web + log
अपभ्रंश == blog,
मराठी - अनुदिनी, रोजनिशी
blogging.- ब्लॉग लिहीणे
blogger - ब्लॉग लिहीणारा अर्थात तुम्ही .. :)

रोज जशी आपण अनुदिनी किंवा रोजनिशी लिहितो तशा संकल्पनेतून ह्या प्रकाराची निर्मीती झाली. रोज काहीना काही लिहायचे, वाचायचे आणि त्यावर मत मांडायचे यावर हा फंडा आधारलेला आहे. विशेषत: IT कंपन्यांमधून काम करण्या-या लोकांना वाचायला लिहायला काही वेगळावेळ मिळत नाही. त्यामुळे त्या घाईगडबडीच्या जगात पटकन काम करता करता एखादा मित्राचा ब्लॉग वाचला, त्यावर त्याला टपली मारली आणि आपला हालहवाल आपल्या ब्लॉगवर टाकाला. लोकांना पत्ता कळवून त्या संस्थळावर आणायला लागतो तेवढाच काय तो वेळ! त्यानंतर लोक आपोआप परत येत रहातात, टपल्या कॉमेण्ट्स \ कानपिचक्या, कोपरखळ्या मारतात..
काही जण हा ब्लॉगप्रकार मजेशीर पद्धतीने हाताळतात तर काही अगदी गंभीरतेने .. म्हणतात ना व्यक्ति तितक्या प्रकृति ! .. ... कोणत्याही उद्देशाने तुम्ही हा प्रकार वापरा तो तुम्हाला वेड लावेल त्याच्या प्रेमात पाडेलच यात शंका नाही. मात्र तुम्ही काहीतरी मजेशीर किंवा माहितीपूर्ण मनोरंजक लिहीत राहिले पाहिजे ..

लिहायलाच पाहिजे असं काही आहे का ?
नाहीच मुळी ..लिहील नाही समजा जाता जाता मोबाईलवर एखादा मजेशीर फोटो मिळाला तर तो टाकायचा. अगदी काहीही .. तुम्ही पेपर मधे काय वाचलत त्यावर तुमचे मत काय आहे किंवा एखाद्या झक्कास पदार्थाची रेसिपी किंवा तुमची आवड्ती कविताही चालेल किंवा एखादी मजेशीर गोष्ट, मित्राच्या वाढदिवसाचा एखादा व्हिडीओ सुध्दा .. फक्त जे लिहायच किंवा टाकायच ते तुमच्या आनंदासाठी .. लोक ते वाचून खूष झाले तर ते पुन:पुन्हा येतात आणि कॉमेण्ट्स पण पड्तात { मग खरी धमाल सुरू होते ..}
ब्लॉग लिहीताना खरं नाव असलंच पाहिजे असं नाही. तुम्ही एखादं टोपणनाव ही घेऊ शकता जसं जास्वंदी इथं लिहीत आहे. किंवा हे रानफूल इथे लिहितंय ..
पण तुम्ही एकदा ब्लॉग्गर झालात की थोडी जबाबदारी पण येते.. तुम्हाला तुमच्याबद्दल जपून लिहायचे आहेच पण त्यापेक्षाही त्यात सामाजिक भान पण असायला हवं. नाहीतर लोक शिव्या घालायला ही कमी करत नाहीत.

आता इतकं लेक्चर दिल्यावर तुम्ही म्हणाल काही तरी दाखव ज्याला ब्लॉग म्हणतात ! तर तुम्ही जे वाचत आहात तो ही एक ब्लॉगच आहे आणि त्यात मी तुमच्यासाठी हे लिहीत आहे [ज्याला पोस्ट असे म्हणतात.].. तुम्हाला अजून काही मराठी ब्लॉग्स पाहायचे असतील तर तुम्हाला एक छोट काम करायच आहे. फक्त खाली असलेल्या मराठी ब्लॉगविश्व या टिकली वर टिचकी मारा .. आणि एक नवे विश्व तुमच्या पुढे उघडेल. आणखी काही ब्लॉग्स खाली दिले आहेत जे पहायलाच हवेत!

काय ?
तुम्हाला ब्लॉग तयार करायचय .. अरे नक्की सांगतो .. पण पुढल्या पोस्ट मधे !
तोवर शैलेश पिंगळे या मित्रान एक पोस्ट या संदर्भात लिहीली आहे ती जरूर वाचा

happy surfing !

इंटरनेट एक्स्प्लोरर - ०२

2008-11-19T11:13:00.001-08:00

ब्राऊझर्सचा इतिहास पहाता. सगळ्यात जुन्या म्हणजे www या ब्राऊझर कडे जावे लागेल. हा डॉस वर आधारित ब्राऊझर होता आणि त्याला अनुसरूनच पुढे ब्राऊझर तयार केले गेले. पण खरी लोकप्रियता मिळाली ती netscape navigator या ब्राऊझरला. या ब्राऊझर मधे डॉसची क्लिष्टता नव्हती आणि [वेबसाईट्स] संस्थळे पहाणे अगदीच सोपं झाले होते. या नंतर खरतर इंटरनेट्च्या जगात क्रांति झाली. नवनवीन तंत्रज्ञान विकसित केले गेले. संस्थळे दाखवण्याच्या नव नवीन पद्धती निर्माण होऊ लागल्या. या काळात इतरही ब्राऊझर्स आले जसे की viola, Lynx, Mosiac cello आणि त्यानंतर झाला Internet Explorer चा जन्म!
हा ब्राऊसर सर्वात जास्त काळासाठी वापरला गेला कारण हा विंडोज या संगणक प्रणाली बरोबर येतो आणि त्यामुळे याचे वापरकर्ते ही जास्त आहेत. आता या ब्राऊसर ची ८वी आवृत्ति येत आहे.आणि लवकरच आपण त्यातील ही काही खुबी पाहूच. पण आता सध्या IE6 चा वापर करू या!
हा IE६ चा interface GUI म्हणजे चेहरा मोहरा आहे. ज्याला पाहून आपण काही आज्ञांचा वापर करून विश्वजालाची [internetची] माहिती घेत असतो.

menu bar - यातून आपण आज्ञा देऊ शकतो. यात ठराविक आज्ञांचे संच आहेत जे आपण वापरतो.
Command Bar - यावर वारंवार वापरल्या जाणा-या आज्ञांचा संच आहे.
Address bar - यात आपण पाहू इच्छित असलेल्या संस्थळाचा [website] चा पत्ता टाकायचा असतो उदा. www.yahoo.com, www.netvidyarthi.blogspot.com
वरील चित्रात मी माहिती दिलीच आहे कृपया त्यावर टिचकी मारून ते मोठे करून वाचा.

आता आपण सुरुवात तर झक्कास केली आहे. आपण संस्थळांचे पत्त्यांचे प्रकार पाहिले अजून आता पुढल्या वेळेला मी वेबसाईट्च्या उद्देशानुसार त्यांचे प्रकार कसे पडतात व ते कसे ओळखायचे ते सांगणार आहे. माझा दर दोन दिवसाआड पोस्त लिहीण्याचा प्रयत्न राहीलच !
तो पर्यंत .. happy surfing !

संस्थळांचे प्रकार

2008-11-18T03:42:00.001-08:00

www.yourwebsite.com
वरील वाक्यातला .com हा जो शब्द आहे तो आहे त्या संस्थळाचा प्रकार.थोडक्यात आपलं जसं आडनाव असतं तसच आहे हे.. जसं सुनील जोशी आणि रमेश जोशी हे वेगवेगळे आहेत पण तरी ते जोशीच आहेत हे कळतं त्यातलाच हा प्रकार. उदाहरणच घ्यायच झालं तर yahoo.com,आणि google.com,
तसंच काही जण गावाचं नाव लावतात. उदा. शंकरराव सातारकर-पाटील, तसंच आहे yahoo.co.in म्हणजे याहूचे भारतातील व्यावसायिक संस्थळ ! आता पाहूया, या संस्थळां[websites]चे अजून काय्क्काय प्रकार आहेत ते !

.com - Commercials
या प्रकारच्या संस्थळांवर व्यवसायिक माहिती असते. सामान्यत: या प्रकारामध्ये सर्व औद्योगिक आणि छोट्या-मोठ्या व्यवसायांची माहिती देणारी संस्थळे येतात. पूर्णपणे व्यावसायिक दृष्टीकोन ठेवूनच हे संस्थळ निर्माण केले जाते.
उदा. www.borateconstructions.com - ही एक व्यावसायिक बांधकाम करणारी संस्था आहे.
.org - organizations
या प्रकारच्या संस्थळांमध्ये सर्व सामाजिक काम करणा-या, लोकसेवा करणा-या संघटना येतात. NGOs येतात. या मध्ये संस्थळांमधून कोणत्याही प्रकारे आर्थिक उत्पन्न कमविणे हा उद्देश नसतो किंवा असल्यास तो दुय्यम असतो.
उदा. www.gogvip.org - ही संस्था जेट्रोफा या वनस्पतिंपासून इंधन तयार करण्याच्यासाठी काम करत आहे. त्याचा प्रसार करत आहे.
.net - social networking
याप्रकारच्या संस्थळांवर सामाजिक-व्यवसायिक किंवा इतर कोणत्याही उद्देशांना धरून एक संस्थळांचे जाळे विणले जाते. ज्या मधून काही संस्थळे पैसे ही कमवतात तर काही विनामूल्यही सेवा देतात. .net या प्रकारच्या संस्थळांमधून विविध उद्देश साधता येतात.
उदा. मराठीब्लॉगविश्व http://marathiblogs.net/ - हे संस्थळ विना्मूल्य तुमच्या संस्थळाची माहिती इतरांना पुरवते. तुमच्या संस्थळाची अद्यतनेही येथे आपोआप प्रकाशित होतात.

.gov - Governmental services
या संस्थळांवर सरकारी संस्थांची माहिती दिलेली असते. सर्व देशांची अशी संस्थळे आहेत.
उदा. http://india.gov.in/, http://www.maharashtra.gov.in/

.co.in - commercial [website] India
ह्या प्रकारची संस्थळे आता येऊ लागली आहेत जी देशानुसार लावली आहेत. उदा ब्राझील देशातील लोक .co.br असे संस्थळाला जोडतात.
उदा. www.orkut.co.in, www.sbi.co.in/

.info - informational domain
काही संस्थळे माहिती देण्यासाठीच तयार केली जातात जी ठराविक काळानंतर बंद केली जातात. या प्रकारच्या संस्थळांमधून विविध उद्देश साधले जाऊ शकतात.

त्याचबरोबर आता .in, .edu, .biz .mobi असे खूप प्रकार आले आहेत. ज्या प्रकाराची जास्त विक्री होते ते प्रकार ठेवले जातात व इतर मागे पडतात.
तुम्हाला कशी वाटली ही माहिती?
मला जरूर कळवा. आपल्या अभिप्रायामुळे नक्कीच प्रोत्साहन मिळतं .. पुन्हा भेटूच !

मराठी प्रतिशब्द उपक्रम

2008-11-04T10:56:00.001-08:00

मराठी असे आमुची मायबोली ।
जरी आज ती राजभाषा नसे ॥

मराठी अमराठी वाद सध्या जोरात चालू आहेच त्यातच माझ्या वाचनात ब्लॉगमित्र शैलेश खांडेकर यांचा ”विदग्ध” हा ब्लॉग [ ही अनुदिनी] आला/ आली. :) माझ्या वाचनात २-१ वर्षापूर्वी ही हा उपक्रम मनोगत.कॉम च्या द्वारे वाचनात आला होता. पण तो त्यावेळेस अगदी छोटया स्वरूपात होता.

आता ह्या उपक्रमाने जोर धरला आहे. प्रत्येक जण आपापल्या परीने प्रतिशब्द शोधून शब्दभांडारात टाकण्याचा प्रयत्न करत आहे, आणि मी ही त्या उपक्रमाचा भाग होत चाललो आहे अस मला वाटत आहे.मी सुचवलेले शब्द केशरी रंगात दिले आहेत

त्या पैकी काही शब्द खाली देत आहे. वरील शब्दांमधील रंगीत शब्द हे त्या त्या वेबसाईट्स चे [संस्थळांचे] पत्ते आहेत.

मायाजाळ, विश्वजाल, ज्ञानगंगा [ज्ञान + आकाशगंगा] - internet
संस्थळ - website - a place on internet.
पत्र, विपत्र - email
चिट्ठी, चिटोरी, चपाटी - scraps
वटवट, गप्पा, चकाट्या - chat
वापरिका- application
दूरावलोकन - Zoom Out

या उपक्रमात मला काही शब्द पटले काही नाही पटले. काही जड ही वाटले. पण त्या उपक्रमामागचा उद्देश नक्कीच योग्य आहे.

तुम्ही जर नव्यानेच या इंटरनेटच्या विश्वात दाखल होत असाल तर सुरूवाती पासूनच जर तुम्ही हे शब्द वापरात ठेवलेत तर त्या मराठी शब्दांचा प्रसार नक्कीच होण्यास मदत होईल. यात तुम्हीही नवे शब्द सुचवू शकता. विविध विषयांकरता हे शब्द हवे आहेत. तुम्हाला त्याकरता शब्दभांडाराचे सदस्य व्हावे लागते जे ~~विनामूल्य~~ अमूल्य आहे.

तसेच आपल्या या अनुदिनीवर मी मराठीच फक्त शब्द वापरावेत की मराठीबरोबरच "संस्थळ[website]" अशा प्रकारे वापरावेत? ते ही मला सांगा.

* फोटोग्राफर: आशु [पूर्ण नाव माहित असल्यास कळवावे.]

इंटरनेट एक्सप्लोरर - ०१

2008-10-31T11:37:00.001-07:00

नुकतीच दिवाळीची धामधूम संपलीये.. आता सणाला गावाला गेलेली मंडळी त्यांच्या त्यांच्या कामांवर परतली आहेत. दैनंदिन कामं आता परत सूर धरायला लागली आहेत. पण अजून धडामधुडूम चालणारच आहे ते अगदी तुळशीच्या लग्नापर्यंत!
मी या दिवाळीत खूप मजा केली असं अगदी म्हणणार नाही, पण खरेदी, मित्रांच्या भेटीगाठी, दीपोत्सव आणि फराळ याचा मनसोक्त आनंद लुटलाय.. [आता आवाजावरून कळेलच तुम्हाला किती ते! :P ]
इतक्या उशीरापर्यंत पोस्ट न टाकण्याच कारण मात्र "दिवाळीची सुट्टी" हे नव्हतं ! या ब्लॉगला प्रतिसाद यायला लागल्यापासून जरा उत्साह वाढला आणि मी नियोजनाच्या पाठी लागलो. कशा प्रकारे वेगवेगळ्या सॉफ्ट्वेअर्सना मांडायच? एकाच पोस्ट मधे सगळं सांगाव की तुकडे करून .. एकच एक विषय धरायचा की इतर ही काही? मराठी - इंग्रजी भाषा वापरायची की मनोगत.कॉम वर तयार होत चाललेली मराठी प्रतिशब्दांची भाषा वापरायची? का आपणच नवे शब्द शोधायचे ? bla bla bla .. आणि त्यामुळे सलग पोस्ट नाही लिहू शकलो. असो.. आता या येत्या पोस्टस मधे नक्की आपण काय पहाणार आहोत?, याच विषयी सांगितलं आहे खालील व्हिडीओत! तुमच्या उत्सुकतेला थोडा अजून ताण द्या. लवकरच मी यातील एक एक मुद्दे आणि मधेच एखादी वेगळी पोस्ट घेऊन येणार आहे.

ता.क. : ह्या प्रक्षेपणात इंग्रजीमधे मुद्दे लिहीले आहेत. पुढील प्रक्षेपणांमधे सर्व मुद्दे मराठीतूनच असतील. यावेळेस तसदी बद्दल क्षमस्व.

शुभ दीपावली

2008-10-26T16:55:00.001-07:00

दिवाळीच्या पहाटे पहाटे आज ही पोस्ट लिहिताना खूप मस्त वाटत आहे. नेहेमीप्रमाणे २-३ दिवस आधी किंवा उशीरा पोस्ट टाकायला ही काही पोस्टाची पोच नाही .. पण ही पोस्ट वाचल्यावर तुमच्या प्रतिक्रियांची बक्षीस द्यायला विसरू नका हं! तर असो ..

ही दिवाळी आपणास सुख, शांती, समाधान, समृद्धी, ऐश्वर्य, आरोग्य, प्रतिष्ठा या सप्तरंगी दिव्यानी आपले जीवन प्रकाशमय करणारी होवो. हा प्रकाशाचा उत्सव आपल्या जीवनात आनंद ज्ञान आणि चैतन्य घेऊन येवो.

माझ्याकडून पुढील पोस्ट्ला उशीर होईल अस दिसत आहे. तरी ही मी लवकरात लवकर पोस्ट करायचा प्रयत्न करीन .. :)
तोवर enjoy .. आणि फराळावर ताव मारा ! :D

ब्राऊझर्सचे महत्व

2008-10-17T11:17:00.001-07:00

गेल्या पोस्टमध्ये आपण स्पॅम म्हणजे काय पाहिलं आणि त्या आधिच्या पोस्टमध्ये ब्राऊझर म्हणजे काय ते ! आता आपण ब्राऊझर मधल्या काही छोट्या गोष्टी पहाणार आहोत. ज्या मी येत्या प्रक्षेपणात दाखवणार आहेच पण आपण काय काय पहाणार आहोत याचा हा एक आलेख आहे म्हणाना ! मला राहून राहून या ब्राऊझरला समजावून सांगताना नावेचं आणि नावाड्याचं उदाहरणच द्यावस वाटतय .. नावांचे - होड्यांचे जसे प्रकार असतात तसेच या ब्राऊझरचे ही आहेत. सुरक्षिततेच्या दृष्टीने, वापराच्या दृष्टीने काही उपयोगी ठरणारे आहेत तर काही जुने पण stable म्हणून प्रसि्द्ध आहेत. सर्व सामान्यनजरेने पाहिलं तर या ब्राऊझर प्रकारच्या applications [संगणक प्रणाली / आज्ञावली ] मध्ये आपण खालील सोयी पहातोच पहातो.

history - या मधे आपण आता पर्यंत पाहिलेल्या सर्व माहितीस्थानांची [websites] माहिती येते. आपण कधी केंव्हा किती वेळ कोण कोणती पाने चाळली ते पहाता येते.
bookmarks / favorites - आपण इथे आपल्यला आवडलेल्या पानांची नोंद करून ठेवू शकतो जे आपण नंतर परत कधी / वारंवार वापरू शकतो. जसे आपण पुस्तक वाचताना पुस्तकामधे एखादी खूण म्हणून काही कागद वा पेन ठेवतो तसेच हे आहे. ते आपल्या संगणकावर नोंदले जाते.
home page - हे आपले मुख्यपान आहे. कोणतेही पान मुख्यपान होऊ शकते. ते कसे ठेवायचे ते आपण पाहाणारच आहोत.
download service.- आपल्याला उपयुक्त अश्या अनेक माहिती व मनोरंजन पर गोष्टी internetवर आहेत. त्या offline[इंटरनेट चालू नसताना ही] आपल्याला पहायच्या असतील तर त्या Download कराव्या लागतात त्याची सुविधा.

तसेच काही ठराविक आज्ञाही पाहातो.

back / forward - history
refresh / stop
go
print

तसेच काही ठराविक आज्ञासंच पट्ट्या [tool bars] पहातो

standard button bar
address bar
status bar
bookmarks / favorites / links bar

या सर्वांची माहिती आपण आता येत्या प्रक्षेपणात पहाणार आहोत. तो वर भेट देत रहा.

स्पॅमायणाचा उत्तरार्ध !

2008-10-12T12:12:00.000-07:00

Dictionary:
spam
pronunciation :(स्पॅम) (spăm) ..
n : Unsolicited e-mail, often of a commercial nature, sent indiscriminately to multiple mailing lists, individuals, or newsgroups; junk e-mail.
i.e.
Senseless Pointless Annoying Message
Sending People Annoying Mail
Sad Pointless Annoying Messages
blah blah blah . ..

तर हे स्पॅम नक्की आहे तरी काय?
सोप्पं नेहमीच्या भाषेत सांगायचं झालं तर पेपरमधे जशी पत्र-पत्रावळ्या येतात तश्या प्रकारच्या इमेल्स किंवा वेबसाईटस. पण जाहिरात आणि स्पॅमिंग ह्यात नक्कीच फरक आहे. अगदीच आपण वर्तमानपत्रातील पत्रावळ्यांशी तुलना केली तर त्यात त्या पत्रावळ्या ब~या असं म्हणावं लागेल.[निदान रद्दीत तरी घालता येतात ! :P ] स्पॅम या प्रकारच्या वेबसाईट अथवा इमेल्समधे आपण आपल्या नकळत ओढले जातो आणि वेगवेगळ्या ठिकाणांना भेट देत रहातो. ज्यामुळे ज्याने स्पॅम केले आहे त्याला पैसे मिळत रहातात.

नक्की काय असतं ? कसं करतात हे ?
साधं गणित आहे. एका माणसाने एक वेबसाइटच्या लिंक वर क्लिक [ टिचकी ] मारल्यावर जर स्पॅमरला त्याचं कमिशन $1 मिळत असेल तर जो स्पॅमर आहे, तो त्या कंपनीसाठी किंवा ती लिंक [पत्ता / दुवा ] जास्तित जास्त लोकांपर्यंत पोहोचवतो आणि पैसे मिळवायचा प्रयत्न करतो. जर मी २००० इमेल्स पाठवल्या तर त्यातून मला किमान $२०० ते $५०० मिळू शकतात. पण पैसे मिळण्याची काहीही खात्री अशी नसतेच. त्यातून ह्या मेल्स अतिशय त्रासिक [ डोक्यात जाणा~या / वैताग आणणा~या / पुन्हा पुन्हा येणा~या :X ] असतात. त्यावर तुम्हाला विचार करायला किंवा टिचकी मारायला लावणा-या असतात.
हे स्पॅम तुम्हाला कुठे दिसेल ?
आपल्याला काही offers चे वैताग आणणारे फोन - sms येतात, काही पत्र येतात ते ही मला स्पॅमच वाटतात[तुमच काय मत आहे ?]
इंटरनेटवर तुम्हाला स्पॅमर्स सगळीकडे दिसतील. काही वेबसाईटस, ब्लॉग्स, सोशल कम्युनिटीज आणि अगदी तुमच्या इमेल बॉक्समधे पण! आपल्या न कळत जे जवळ येतात आणि पैसे कमवतात.
ते ठीक आहे हो पण कसं ओळखायचं ?
काहीही संबंध नसताना एखाद्या रेश्माची, सुनेत्राची अथवा रमेशची तुम्हाला इमेल येते. जो तुम्हाला ओळखीचाही नाही आणि त्याने अनेक जणांना अशीच इमेल केलेली आहे. त्यात तुम्हाला तुमची माहिती विचारलेली असते आणि इतरत्र टिचकी मारा म्हणजे पैसे किंवा अजुन काहि मिळेल अशी लालूच दाखवलेली असते. [उदा. click here for $100 prize, you are selected for exclusive offer, Black dollor is yours, all chain letters, pyramid business letters. blahblah blah .. :X ] असे दिसल्यास त्या मेलला स्पॅम म्हणता येइल.
[या समजण्याकरता वेळ मिळेल तेंव्हा तुमच्या इमेल बॉक्सचे junkmail or spam mails उघडून पहा. नुसते विषय वाचलेत तरी कळेल हे काय आहे ते !]
एखाद्या वेबसाइट्वर तुम्हाला तुमच्या न कळत नेले जाते आणि तिथेच गुंगवून ठेवले जाते त्या वेबसाईटवर तुमच्याशी संबंधीत मजकूर नसतो पण तुम्ही ते पहात रहाता कारण ते आकर्षक असते. यामध्ये जुगार, सट्टा-बेटिंग ते प्रौढांसाठीच्या वेबसाईट्स समाविष्ट आहेत. तुम्ही त्या स्पॅम म्हणू शकता. थोडं नीट पाहिलं तर अशा मेल्स अथवा वेबसाईट्स लक्षात येतात.
यातील बारकावा : जाहिराती व स्पॅम
यामध्ये प्रेक्षक - जाहिरात प्रदर्शक - जाहिरात सेवा संस्था - जाहिरातदार
[ viewer - advertise exhibitor - advertise provider - advertiser] असे प्रकार येतात. जे या सर्व गोष्टीस कारणीभूत ठरतात. म्हणायला गेल तर हा खूपच सखोल विषय आहे. त्यावर परत कधी तरी बोलू.
जाहिराती वेबसाईटवर असणं किंवा कोणत्याही वेबपेज ला भेट देण्याचे निमंत्रण पाठवणं हे स्पॅमिंग होत नाही तर तो एक जाहिरात करून अर्थार्जनाचा अधिकृत भाग आहे. प्रेक्षकाला जबरदस्तीने ओढून वा वारंवार एकच एक सांगून फसवणे किंवा एखाद्या जाहिरातीवर टिचकी मारण्यास भाग पाडले तर तो स्पॅमिंगचा भाग होऊ शकतो.
वेबसाईट्ससाठी अधिकृत जाहिरात सेवा स्वत: गूगल व याहू सारख्या अजून काही वेबसाईट्सही पुरवतात.

बरं या स्पॅमवर उपाय काय?
आहे ना ! स्पॅमिंग हे गूगल, याहू अश्या मोठ्या सेवांनी अवैध ठरवले असून आता त्याविरूद्ध त्यांनी मोठ्याप्रमाणावर मोहीम काढली आहे.
यातून वाचण्यासाठी तुम्ही खालील प्रकार वापरू शकता.
Spam filters [जे तुमच्या इमेल सेवा देणा-या संस्थेने देणे आवश्यक आहे.]
Anti spam softwares [ जे तुम्ही इंटरनेट्वर शोधून download करून वापरू शकता.]
यापेक्षा तुम्ही तुमचे स्वत:चे आणि एक सार्वजनिक किंवा अनेक वेगवेगळे असे इमेल पत्ते काढून यावर मात करू शकता. ज्यामुळे तुमची खरी माहिती फार जण वाचू शकणार नाहीत. तसेच अगदी गरज असेल तिथेच तुमची खरी माहिती द्या.

अधिक माहितीसाठी इथे टिचकी मारा. तुम्हाला इथे इत्यंभूत माहिती मिळेल. मी अजूनही काही वेबसाईट्स चाळल्या आहेत याबद्दल त्यांचे पत्ते खाली दिले आहेत. या वेबसाईट्स english मधे आहेत.

http://www.answers.com
http://googlesystem.blogspot.com
http://docs.yahoo.com

आपल्याला काही offers चे वैताग आणणारे फोन - sms येतात, काही पत्र येतात ते ही मला स्पॅमच वाटतात. [तुमचं काय मत आहे ?] नक्की नोंदवा..

आता परत भेटू लवकरच!
तोवर have a happy & safe surfing !

हुर्र्रे ! आपण सुटलो ..

2008-10-11T04:37:00.000-07:00

अरे हे मधेच काय लिहितोय हा ? असं मनात आलं असेल तुमच्या, पण झालंच तस होतं.

जे जे आपणासी ठावे| ते ते इतरांसी सांगावे ||
शहाणे करून सोडावे | सकळजन ..||

या श्लोकास प्रमाणमानून हा ब्लॉग सुरु केला आणि पहिला धक्का गूगल नेच दिला. आता नक्की काय झालेलं ते सांगणं कठीणच आहे तरीही पण सांगायचा प्रयत्न करतो.

गूगल ही सध्याची सर्वात मोठी internet मधील सेवा देणारी संस्था आहे. या वेबसाईट्मागे ही जे तंत्रज्ञान आहे ते ही गूगलचंच! आता झालं काय की हा ब्लॉग सुरळीत लागायला आणि त्याला स्पेम घोषित करायला एकच वेळ आली आणि माझा हा ब्लॉग चक्क गूगलने ब्लॉक [प्रतिबंधित] केला. मलाही हे सारं नवीन होत त्यामुळॆ थोडा मूड गेला होता. [ पण its oke.. you will pass through :) असा तुमच्यापैकी काही मित्रानी धीरही दिला. thanks to all support friends ! ]
खरं सांगायचं तर कारण काहीच नव्हतं मी कोणत्याही नियमांच उल्लंघन केलं नव्हतं की अजून काही वेगळंही केल नव्हतं. स्वत: गूगलच्या विपत्रात [email] त्यानी हे मान्य केलं होत की आमच्या स्वचलित anti spam filters च्या काही चुकांमुळेही कधी कधी असे होते. तरी खालील पत्त्यावर संपर्क साधा. आपल्या ब्लॉगला मधून मधून भेट देणा~या काहीजणांनी त्यांची नोटीस ही सुरुवातीचे वेळेस पाहिली ही असेल. दोन दिवस आपली वेबसाईट त्यांच्या निरीक्षणाखाली होती आणि शेवटी आपण पास झालो !

आता हे सर्व रामायण ऐकल्यावर विचारा हे स्पॆम म्हणजे काय ?
त्यावर उदया लिहिन .. आज इतकंच ..

ब्राऊझर्सची ओळख..

2008-10-05T02:34:00.000-07:00

ब्राऊझर्सची ओळख..

जेव्हा पासून या ब्लॉगबद्दल लिहायला विचार करायला सुरुवात केली आहे तेव्हापासून घरातलं मित्रांमधलं वातावरण बदललय.. मी परवा पेपर वाचताना आईला म्हणलं कोडं आलंय का? कोणत्या पानावर आहे? ती म्हणे कसला कोड ? म्हणजे

computer code ..
काय म्हणू .. दोन मिनीट उडालोच !

असो .. सुरूवातीला आपण इंटरनेट्चा इतिहास.. त्यानंतर त्याची theary  हे समजून घेणार आहोत असं जर तुम्हाला वाट्त असेल तर ते साफ चूक आहे.. मी या कशात ही आत्ताच न पडता तुम्हाला Direct वापर कसा सुरु करायचा आणि काय काय इथे आहे ते दाखवणार आहे.
सर्व प्रथम तुमच्या सर्वांच्या प्रतिसादाबद्दल मनापासून धन्यवाद !

श्री गणेशा!
इन्टरनेटचा वापर करण्यासाठी आपल्याला काही सॉफ्टवेअरस [संगणकप्रणाली] लागतात. त्याना ब्राउसर्स असे म्हणतात. काय आहे हे प्रकरण ? कसा किती आणि किती प्रकारचे आहेत ते? हे सर्व आपण या videoत पहाणार आहोत.

स्क्रीनकास्ट = प्रक्षेपण क्र ०१



या नंतर आपण एकेक सुविधांची छोट्या छोट्या प्रक्षेपणांमधून माहिती पाहूच .. so Stay connected !

e - संवाद

2008-10-03T00:41:00.000-07:00

"इंटरनेट्च्या शोधामागचा मूळ उद्देश लक्षात घेतला तर तो आहे संवाद आणि माहितीची देवाणघेवाण "

.. अगदी सरकारी संगणक व माहिती तंत्रज्ञान प्रशिक्षण पुस्तिकेतलं वाक्य वाट्तंय ना .. पण आहेच तसं. मूळ कुठल्याही माध्यमाच्या निर्मीती किंवा शोधामागे संवाद हेच एक कारण आहे. त्याला इंटरनेट कसा अपवाद असेल. ईमेल, text-chat = सहजसंवाद [chat - ला मराठी शब्द म्हणून कसा वाट्तो ?] वेगवेगळ्या फोरम्स आणि वेबसाईट्स या सर्व माध्यमातून आपण काही ना काही प्रकारे कुणाशी न कुणाशी संवाद साधू शकतो.

इमेल : सर्व प्रथम इमेल हा प्रकार अस्तित्वात आला. याला इपत्र किंवा विपत्र असं ही मराठीत म्हणता येइल.पूर्वी ही सर्व्हीस मोफत नव्हती पैसे देऊनच वापरता येत होती. पण सबीर भाटिया व जॅक स्मिथ या मित्रांनी मिळून केलेल्या प्रयत्नाने hotmail.com चा जन्म झाला. hotmail ही पहिली वेबमेल सर्व्हिस होती जी फुकट आणि सहज वापरण्याजोगी होती. साहाजिकच hotmail हिट & हॉट झाली. लोकांनी या सेवेला प्रचंड प्रतिसाद दिला. "जे जे फुकट ते ते पौष्टिक " या उक्ती प्रमाणे मोफत वेबमेल सर्व्हिसेस सद्ध्या खूपच पॉप्युलर आहेत.
इंटरनेटवर gmail.com , yahoo.com या सर्व्हीसेस तर जगप्रिय आहेतच .. पण भारतीय म्हणून सांगायच्या झाल्या तर indiatimes.com , rediffmail.com , zapakmail.com याही भरपूर वापरल्या जातात. पण सुरक्षा, भरपूर साठवण्याची जागा, व्यक्तिगत सेवा, स्पैम फिल्टर्स , एन्टीव्हायरस [संगणकीय विषाणू रोधक :) ]आणि इतर सुविधां हव्या असतील तर इमेल सेवेसाठी पैसे मोजणेही योग्य ठरते!

लवकरच आपण या सर्वांची detailed माहिती करुन घेणार आहोत..
प्रक्षेपण लवकरच येत आहे. [ ब्राउझर म्हणजे काय?]